حوزہ نیوز ایجنسی کی رپورٹ کے مطابق، میڈیا ذرائع نے اطلاع دی ہے کہ حشد الشعبی کا ایک اعلیٰ سطحی وفد ایرانی صدرحجۃ الاسلام والمسلمین سید ابراہیم رئیسی، ایرانی وزیر خارجہ حسین امیر عبد اللہیان، امام جمعہ تبریز سید محمد علی آل ہاشم اور ان کے ساتھیوں کی شہادت پر تعزیت پیش کرنے کے لیے تہران پہنچ گیا ہے۔
عراق کی سرکاری خبر رساں ایجنسی کے مطابق یہ اعلیٰ سطحی وفد حشد الشعبی کے ہیڈکوارٹر کے سربراہ شہید ابو مہدی المہندس کے جانشین عبدالعزیز محمداوی (ابوفدک) کی سربراہی میں جمعہ کی شب تہران روانہ ہوا۔
واضح رہے کہ گزشتہ پیر کو المحمداوی ایک وفد کے ہمراہ بغداد میں اسلامی جمہوریہ ایران کے سفارت خانے میں تعزیت کے لئے بھی گئے تھے اور انہوں نے عراق میں ایرانی سفیر سے صدر ایران، وزیر خارجہ اور ان کے دیگر ساتھیوں کو لے جانے والے ہیلی کاپٹر کے حادثے کے بارے میں گفتگو کی اور تسلیت پیش کی۔
